تۇرمەدەگى اقىن، بەلسەندى، ديسسيدەنت ارون اتابەكتى بوساتۋ جونىندە 2،5 مىڭ ادامنىڭ قولى قويىلعان حات پرەزيدەنت قاسىم-جومارت توقايەۆقا جولداندى. بۇل جونىندە قۇقىق قورعاۋشى باقىتجان تورەعوجينا  Facebook پاراقشاسىندا حابارلادى. 

"قوعامنىڭ پرەزيدەنت قاسىم-جومارت توقايەۆقا ارون اتابەكتى بوستاندىققا شىعارۋ جونىندەگى ۇندەۋى جىبەرىلدى. حاتقا 2،5 مىڭعا جۋىق قول قويىلدى، 377 رەپوست جاسالدى. كوپ راقمەت!" دەلىنگەن حابارلامادا. 

ارون اتابەككە راقىمشىلىق جاساۋ جونىندەگى حاتقا قول جيناۋ وتكەن اپتادا باستالعان.

ايتا كەتەيىك، 18 تامىز كۇنى ازاپتاۋعا قارسى ۇلتتىق الدىن الۋ تەتىگى توبىنىڭ وكىلدەرى پاۆلودار وبلىسىنداعى اپ-162/1 تۇزەتۋ مەكەمەسىنە جازاسىن وتەپ جاتقان اقىن ارون اتابەككە بارعاننان كەيىن، ونىڭ ءحالىنىڭ ناشار ەكەنىن ايتقان ەدى.

ارون اتابەك 15 جىلدان بەرى تۇرمەدە وتىر. ول 2006 جىلعى "شاڭىراق" وقيعاسىنان كەيىن 18 جىلعا سوتتالعان. سوت اتابەكتى "شاڭىراق" وقيعاسى كەزىندە قازا تاپقان پوليسيا قىزمەتكەرىنىڭ ولىمىنە ايىپتى دەپ تانىعان.

توقايەۆتىڭ اتىنا جازىلعان حاتتى مىنا سىلتەمەدەن وقي الاسىز.